නම ගිය සමාගමක් වසා දැමූ පාසල් ගොඩනැගිල්ලක පණුවන් සමග පලතුරු යුෂ නිෂ්පාදනාගාරයක්

අලව්ව මහාරච්චිමුල්ල ප‍්‍රදේශයේ අතහැර සමන ලද පාසල් ගොඩනැගිල්ලක පවත්වාගෙන ගිය නරක් වූ සහ පණුවන් සහිත පලතුරු යොදා ගනිමින් පලතුරු යුෂ නිපදවීමේ මහා පරිමාණ ජාවාරමක තොරතුරු අනාවරණය කර ගැනීමට අලව්ව සෞඛ්‍ය නිලධාරීන් සමත් වී තිබේ.

මෙසේ නිපදවන පලතුරු යුෂ මෙරට ප‍්‍රසිද්ධ පලතුරු බීම සමාගමකට සැපයීම් කර ඇති බවටද අනාවරණය වී තිබේ.

එසේ නිපදවූ අපිරිසිදු පලතුරු යුෂ බෝතල් කොට ප‍්‍රසිද්ධ වෙළද නාමයක් යටතේ දිවයින පුරා බෙදා හැර ඇති බවද අලව්ව සෞඛ්‍ය වෛද්‍ය නිලධාරීහු ප‍්‍රකාශ කරති.

‘මිලාන් ෆුඞ් සප්ලයර්ස්’ නැමති එම කර්මාන්ත ශාලාවේ වැටලීම සිදුකළ අවස්ථාවේදී එම කර්මාන්ත ශාලාවේ පලතුරු යුෂ නිපදවීමට යොදා ගනිමින් තිබූ පණුවන් සහ පුස් සහිත දිවුල් ගෙඩි 1700ක්, අඹ ගෙඩි 200ක් සහ එවැනි පලතුරු වලින් නිපදවා තිබූ කිලෝග‍්‍රෑම් 30ක් බැගින් අඩංගු පලතුරු යුෂ සහිත ප්ලාස්ටික් බදුන් 107ක්ද සොයාගෙන ඇත.